ГОЛ ӨНЦӨГ

• 2022Q3 борлуулалтын орлого өмнөх оны мөн үеэс 66%-аар, цэвэр ашиг 99%-аар өссөн байдалтай байна.
• Цэвэр ашгийн өсөлтийн нөлөөгөөр эздийн өмчийн өгөөж (ROE) 10.0 нэгж хувиар нэмэгдэж, үнэ ашгийн харьцаа P/E=11.8х болтлоо буурчээ.

IPO хийснээс хойш борлуулалтын орлого 3.2 дахин, цэвэр ашиг 5 дахин өссөн үзүүлэлттэй байна.

   Монос Хүнс ХК-ийн энэ оны 3-р улирлын гүйцэтгэлээс харахад компанийн ашигт ажиллагаа сайн байгаа юм. Тус компани нь 21.6 тэрбум төгрөгийн борлуулалт хийж, 2.7 тэрбум төгрөгийн цэвэр ашигтай ажилласан нь өмнөх оны мөн үетэй харьцуулахад борлуулалтын орлого 66%-аар өссөн бол цэвэр ашиг 99%-аар өссөн амжилтыг үзүүлжээ. 2022 оны 3-р улиралд 2021 оны нийт борлуулалтыг 19%-аар, цэвэр ашгийг 35%-аар давуулан биелүүлж чадсан байна. 

Ашигт ажиллагаа нэмэгдэж, үнэлгээ харьцангуй хямдарч байна.

   Цэвэр ашгийн өсөлт нь хөрөнгө оруулагч нарын дунд чухал гэгдэх үзүүлэлтүүд болох эздийн өмчийн өгөөж болон үнэ ашгийн харьцаанд эергээр нөлөөлсөн билээ. Үүнд эздийн өмчийн өгөөж 10.0 нэгж хувиар өсөж 20%-д хүрсэн ба үнэ ашгийн харьцаа буурч 11.2 нэгж хувиар буурч 11.8x болсон ажээ. Энэ нь хувьцаа үнэлгээний хувьд хямдарч бодит үнэ цэндээ дөхөж байгааг илтгэж байгаа билээ.

   Балансын хувьд нийт хөрөнгө 2020 онд хөрөнгийн дахин үнэлгээний нөлөөгөөр буурсан бол 2021 оноос хойш өсөж энэ оны 3-р улирлын байдлаар өмнөх жилээс 55%-аар өссөн дүр зурагтай байна. Үүнд урьдчилж төлсөн зардал тооцоо 7 тэрбум төгрөгөөр өссөн нь голчлон нөлөөлсөн байна. Харин өөрийн хөрөнгийн хувьд ашигт ажиллагаа сайжрахын хирээр өсөж 17 тэрбум төгрөгт хүрсэн байна.

ДҮГНЭЛТ

   Монос Хүнс ХК-ийн 2022 оны 12-р сарын 22-ны хаалтын ханш 112 төгрөг байсан ба өмнөх өдрөөс 11.5%-ийн өсөлтийг үзүүлсэн байна. Ханш IPO хийснээс хойш жилд дунджаар 9%-ийн өсөлттэй байгаа билээ. 2022 оны 3-р улирлын тайлангийн гүйцэтгэлийг дүгнэхэд компанийн ашигт ажиллагаа сайжирч, огцом өсөлт үзүүлсэн байдалтай байна. Борлуулалтын орлогын 66%, цэвэр ашиг 99%, эздийн өмчийн өгөөж 10 нэгж хувиар өссөн бол үнэлгээний хувьд харьцангуй хямд түвшинд байна. 2022 оны эцэст компанийн ашигт ажиллагаа улам сайжрах хүлээлтийг үүсгээд байгаа билээ. 

Дараагийн мэдээгээр Монос Хүнс ХК-ийн өгөөж болон үнэлгээ бусад компаниудтай харьцуулахад ямар түвшинд байгаа талаар хүлээн авч уншаарай.

Хэрэв та тус компанийн тухай илүү дэлгэрэнгүй мэдээлэл, судалгаа авахыг хүсвэл дараах линкээр бүртгүүлээрэй. Бүртгүүлэх: https://tavanbogdcapital.com/FeaturedItem/756956