ГОЛ ӨНЦӨГ: 

• “"Хас Банк” ХК нь цэвэр ашгаас нэгж хувьцаанд ₮𝟏𝟖 буюу нийт ₮18.9 тэрбумыг ногдол ашиг болгон тараахаар боллоо.
• Бүртгэлийн өдрийг 2024.08.08-ны өдрөөр тогтоов.
• Ногдол ашгийн өгөөж II улирлын байдлаар 2.5% байна.

Ногдол ашиг тараах тухай:

   “Хас Банк” ХК-ийн Төлөөлөн удирдах зөвлөлийн 2024.07.16-ны өдрийн R-2024-33 тоот тогтоолоор компанийн 2024 оны эхний хагас жилийн цэвэр ашгаас нэгж хувьцаанд ₮18 төгрөг буюу нийт ₮18.9 тэрбумыг хувьцаа эзэмшигчдэд ногдол ашиг болгон хуваарилахаар шийдвэрлэлээ.

   Ногдол ашиг авах эрхтэй хувьцаа эзэмшигчдийн жагсаалт гаргах бүртгэлийн өдрийг 2024.08.08-ны өдрөөр тогтоосон байна. 

   Тус шийдвэрийг Монгол банкнаас зөвшөөрч, “ХасБанк” ХК-ийн Дүрмийн дагуу компанийн хувьцаа эзэмшигчдийн хурлаар эцэслэн баталсны дараагаар ногдол ашгийг тараах юм.

Хувьцааны ханшийн тухай:

   Хас банк 2023.06 сард IPO хийж нэгж хувьцаагаа ₮677-өөр арилжаалсан. 2024.07.18-ны өдрийн байдлаар IPO хийсэн ханшаас 6.4%-ийн өсөлттэй байна.  2024.05 сард ₮773-д хүрсэн нь хамгийн өндөр ханш байв. 

Шинжээчийн дүгнэлт

   2024.07.19-ний өдрийн байдлаар “Хас банк” ХК ₮720 дээр хаагдсан ба 2024 оны II улирлын байдлаар (хагас жилийн хувьцааны ханшийн дунджаар) тооцвол ногдол ашгийн өгөөж 2.5% байна. Энэ нь өмнөх оны мөн үеийн ногдол ашгийн өгөөжөөс 0.2 нэгж хувиар өссөн үзүүлэлт юм. 2024 оны II улирлын байдлаар өөрийн хөрөнгийн өгөөж /ROE/ 30%-д хүрсэн нь ТОП 20 индексийн дунджаас 8 нэгж хувиар өндөр үзүүлэлт билээ. 

   ХАС банкны хувьд хувьцааны үнэлгээг тодорхойлдог үнэ ашгийн харьцаа P/E=4.6x байгаа нь Монголын хөрөнгийн биржийн I ангилалд бүртгэлтэй хувьцаат компаниудын дунджаас 2 дахин бага буюу хямд байна. Нөгөө талаас үнэ дансны үнийн харьцаа P/B=1.1x байгаа нь IPO хийх үеэс 0.3 нэгжээр буурсан буюу зах зээл дээр ханш илүү бодит үнэ цэн рүүгээ ойртсон байна.  

Хас банкны эхний хагас жилийн тайланг дараах линкээр https://tavanbogdcapital.com/news/35165200 дамжуулан үзэх боломжтой.