ГОЛ ӨНЦӨГ

• VIII сард борлуулсан автомашины 65.2%-ийг цахилгаан болон хосолмол хөдөлгүүртэй автомашин бүрдүүлэв.
• Бензин хөдөлгүүртэй автомашины борлуулалт 40%-иар буурсан бол цахилгаан автомашиных 10.1%-иар буурчээ.
• Газрын тосны үнийн өсөлт, шинэ загвар болон цэнэглэх дэд бүтцийн өргөжилт цахилгаан автомашинд шилжих хөдөлгөөнийг дэмжиж байна.

БНХАУ-ын автомашины зах зээл саарч байгаа ч цахилгаан автомашины нийт борлуулалтад эзлэх хувь түүхэн дээд түвшинд хүрлээ. “China Passenger Car Association”-ийн мэдээлснээр, VIII сард эх газрын Хятадад борлуулсан 1.54 сая автомашины 65.2%-ийг цахилгаан болон хосолмол хөдөлгүүртэй автомашин бүрдүүлжээ.

Энэ нь VII сард тогтоосон 65.1%-ийн өмнөх дээд үзүүлэлтийг ахиулсан байна.

Гэхдээ зах зээлийн эзлэх хувь өссөн нь цахилгаан автомашины борлуулалт нэмэгдсэн гэсэн үг биш юм. VIII сард цахилгаан автомашины нийлүүлэлт өмнөх оны мөн үеэс 10.1%-иар буурсан ч бензин хөдөлгүүртэй автомашины борлуулалт 40%-иар огцом агшжээ. Ийнхүү уламжлалт автомашины борлуулалт илүү хурдтай буурсан нь цахилгаан автомашины зах зээлд эзлэх хувийг нэмэгдүүлсэн байна.

Шатахууны үнийн өсөлт шилжилтийг хурдасгав

Ираны дайнаас шалтгаалан газрын тосны үнэ өссөн нь бензин хөдөлгүүртэй автомашины ашиглалтын зардлыг нэмэгдүүлж “UBS”-ийн тооцоолсноор газрын тосны үнэ баррель нь 90 ам.доллар орчимд хадгалагдвал БНХАУ-ын бензин автомашин эзэмшигчдийн жилийн шатахууны зардал дайны өмнөх үеэс ойролцоогоор 2,000 юаниар нэмэгдэх боломжтой аж.

Үүний зэрэгцээ жолоодлогын систем болон бусад шинэ технологиор тоноглосон олон зуун шинэ загвар зах зээлд гарсан нь хэрэглэгчдийн цахилгаан автомашиныг сонгох сонирхлыг дэмжиж байна.

Цэнэглэх дэд бүтэц өргөжив

2026 оны VII сарын эцсийн байдлаар БНХАУ нийт 5.1 сая нийтийн цахилгаан автомашины цэнэглэх цэгтэй болсон нь өмнөх оны мөн үеэс 21.3%-иар өссөн үзүүлэлт юм. Өрхийн цэнэглэгчийн тоо 48.8%-иар нэмэгдэж, 18.6 сая орчимд хүрчээ.

Цэнэглэх сүлжээ өргөжиж, нэг цэнэглэлтээр туулах зай нэмэгдсэнээр хэрэглэгчдийн хол замд цэнэг дуусахтай холбоотой болгоомжлол буурч байна.

ДҮГНЭЛТ

БНХАУ-д цахилгаан автомашины зах зээлд эзлэх хувь төрийн татаас болон татварын хөнгөлөлт буурсан үед ч түүхэн дээд түвшинд хүрлээ. Шатахууны үнийн өсөлт, технологийн шинэчлэл болон цэнэглэх дэд бүтцийн хөгжил нь бензин автомашинаас цахилгаан хөдөлгүүрт шилжих урт хугацааны чиглэлийг дэмжиж байна.

Гэхдээ I–VIII сард цахилгаан автомашины дотоодын борлуулалт 11.6%-иар буурч, 6.67 сая нэгж болсон нь нийт зах зээлийн эрэлт сул хэвээр байгааг харууллаа. Иймээс эзлэх хувийн өсөлт өндөр байгаа ч үйлдвэрлэгчдийн хувьд борлуулалтын бодит өсөлт, үнийн өрсөлдөөн болон ашигт ажиллагаа гол сорилт хэвээр байна.

ЭХ СУРВАЛЖ:

www.scmp.com

www.cnbc.com