ГОЛ ӨНЦӨГ

• Хиймэл оюуны тооцоолох хүчин чадлыг 2030 он гэхэд 9,800 eflops-д хүргэнэ.
• 2026–2030 онд мэдээллийн дэд бүтцэд нийт 3.8 их наяд юанийн хөрөнгө оруулна.
• 100 мянгаас дээш хурдасгуур чиптэй томоохон кластер байгуулж, дотоодын чипийн хэрэглээг нэмэгдүүлнэ.

БНХАУ хиймэл оюуны салбарын өсөлтийг дэмжих зорилгоор 2030 он хүртэл тооцоолох хүчин чадлаа дөрөв дахин нэмэгдүүлэхээр төлөвлөжээ.

Аж үйлдвэр, мэдээллийн технологийн яамнаас танилцуулсан таван жилийн төлөвлөгөөнд хиймэл оюуны тооцоолох хүчин чадлыг 9,800 eflops-д хүргэж, 2026–2030 онд мэдээллийн дэд бүтцэд нийт 3.8 их наяд юань буюу 532 тэрбум ам.долларын хөрөнгө оруулахаар тусгасан байна.

Eflops нь компьютер нэг секундэд гүйцэтгэх тооцооллын хэмжээг илэрхийлдэг нэгж юм. Энэ үзүүлэлт нэмэгдэх тусам том хиймэл оюуны загваруудыг илүү хурдан сургах, олон хэрэглэгчийн хүсэлтийг зэрэг боловсруулах боломж сайжирна.

2026 оны VI сарын эцсийн байдлаар БНХАУ-ын хиймэл оюуны тооцоолох хүчин чадал өмнөх оны мөн үеэс 177%-иар өсөж, 2,185 eflops-д хүрсэн байна. VII сарын эцэст уг үзүүлэлт 2,450 eflops орчим болсон ч 2030 оны зорилтод хүрэхийн тулд одоогийн түвшнээс дөрөв дахин нэмэгдэх шаардлагатай.

Томоохон тооцоолох кластерууд байгуулна

Төлөвлөгөөний хүрээнд 10 мянгаас 100 мянга болон түүнээс дээш хурдасгуур чип бүхий тооцоолох кластеруудыг үе шаттай байгуулахаар болжээ. Эдгээр байгууламж нь хиймэл оюуны загвар сургах, ажиллуулах болон үйлдвэрлэл, эрүүл мэнд, санхүү зэрэг салбарын хэрэглээг дэмжинэ.

БНХАУ-д одоогоор тус бүр 10 мянгаас дээш хурдасгуур чиптэй 52 тооцоолох байгууламж ажиллаж байна. Шинэ дэд бүтцийг газар болон эрчим хүчний зардал харьцангуй бага баруун бүсүүдэд төвлөрүүлж, зүүн бүсийн өндөр эрэлтийг хангахаар төлөвлөжээ.

Дотоодын чипийн хэрэглээг нэмэгдүүлнэ

2025 онд БНХАУ-д зохион бүтээсэн хиймэл оюуны чипүүд дотоодын нийт нийлүүлэлтийн 41%-ийг бүрдүүлсэн байна. Гэхдээ үйлдвэрлэгчдийн программын орчин болон чип хоорондын нийцтэй байдал сул байгаа нь өргөн хүрээнд нэвтрүүлэхэд хүндрэл учруулж байгаа юм.

Иймээс БНХАУ зөвхөн тооцоолох хүчин чадлаа нэмэгдүүлэх бус, дотоодын чип, программын орчин болон дата төвийн дэд бүтцийг нэгдсэн байдлаар хөгжүүлэхээр зорьж байна.

ДҮГНЭЛТ

БНХАУ-ын 3.8 их наяд юанийн хөрөнгө оруулалт нь дата төв, сервер, эрчим хүчний дэд бүтэц болон дотоодын хиймэл оюуны чип үйлдвэрлэгчдэд урт хугацааны эрэлт бий болгох боломжтой.

Гэхдээ шинээр байгуулах хүчин чадлыг үр ашигтай ашиглах, дотоодын чипийн нийцтэй байдлыг сайжруулах болон дата төвүүдийн эрчим хүчний хэрэглээг удирдах нь төлөвлөгөөний амжилтыг тодорхойлох гол хүчин зүйл болно.

ЭХ СУРВАЛЖ:

www.scmp.com

www.cnbc.com