ГОЛ ӨНЦӨГ

• БНХАУ-ын удирдлагууд AI, гадаад худалдаа болон дотоодын хэрэглээг дэмжих асуудлаар өндөр түвшний хоёр хурал хийлээ.
• Экспорт, технологийн салбар хүчтэй өсөж байгаа ч дотоодын хэрэглээ сул хэвээр байгаа нь эдийн засгийн тэнцвэргүй байдлыг улам тодруулж байна.
• Зах зээл VII сарын сүүлчийн Улс төрийн товчооны хурлаас эдийн засгийг дэмжих шинэ бодлогын дохио хүлээж байна.

БНХАУ-ын удирдлагууд хиймэл оюун (AI), гадаад худалдаа болон дотоодын хэрэглээг зэрэг дэмжих асуудлаар өндөр түвшний хоёр хурал зохион байгуулж, эдийн засгийн өсөлтийн шинэ эх үүсвэрүүдийг бэхжүүлэхийн зэрэгцээ дотоодын эрэлтийг сэргээх шаардлагатай байгааг онцоллоо.

Ерөнхий сайд Ли Чян Төрийн зөвлөлийн хурлыг даргалж, хиймэл оюуны хөгжлийг эрчимжүүлэх, хэт том хүчин чадалтай тооцооллын төвүүдийг байгуулах, өндөр чанартай өгөгдөл болон мэргэжлийн боловсон хүчнийг бэлтгэх чиглэлээр бодлогоо үргэлжлүүлэхээр болов. Мөн хиймэл оюуныг үйлдвэрлэл, үйлчилгээний салбарт өргөн хүрээнд нэвтрүүлэхийг зорьж байгаагаа илэрхийллээ.

Үүний зэрэгцээ Хятадын Ардын Улс Төрийн Зөвлөлдөх Зөвлөлийн дарга Ван Хунин дотоодын зах зээлийг бэхжүүлэх асуудлаар тусдаа хурал зохион байгуулж, хэрэглээг нэмэгдүүлэх, хөрөнгө оруулалтыг идэвхжүүлэх, үндэсний эрчим хүчний нэгдсэн зах зээл байгуулах, хот-хөдөөгийн газрын шинэчлэл зэрэг асуудлыг хэлэлцжээ.

 “Macquarie”-ийн ахлах эдийн засагч Ларри Хугийн үзэж буйгаар эдгээр хурлууд нь Бээжин эдийн засгийн "хоёр хурдаар өсөж буй" бүтэц буюу экспорт, технологийн салбар хүчтэй өсөж байгаа ч дотоодын эрэлт сул хэвээр байгааг бодлого боловсруулагчид хүлээн зөвшөөрч байгааг харуулж байна.

Энэ оны эхний таван сарын байдлаар экспорт өмнөх оны мөн үеэс 11.8%-иар өссөн бол жижиглэн худалдааны борлуулалт ердөө 1.4%-иар өссөн нь эдийн засгийн энэхүү ялгаатай өсөлтийг илэрхийлж байна.

Түүнчлэн БНХАУ ногоон эрчим хүч, нүүрстөрөгчийн ялгарлыг бууруулах технологи, эрүүл мэндийн салбарыг эдийн засгийн өсөлтийн шинэ хөдөлгөгч хүч болгон хөгжүүлэхээ дахин нотолсон байна.

Шинжээчдийн үзэж буйгаар эдийн засгийн өсөлтийн эрч оны хоёрдугаар хагаст саарах төлөвтэй байгаа тул бодлого боловсруулагчид хэрэглээ болон хөрөнгө оруулалтыг дэмжих нэмэлт арга хэмжээг авах магадлал өндөр байна. Зах зээл VII сарын сүүлээр болох Улс төрийн товчооны хурлыг анхааралтай ажиглаж байгаа бөгөөд уг хурлаар оны үлдсэн хугацааны эдийн засгийн бодлогын чиглэлийг тодорхойлох төлөвтэй байна.

ДҮГНЭЛТ

БНХАУ-ын эдийн засгийн өсөлтийг AI, өндөр технологи болон экспорт үргэлжлүүлэн дэмжиж байгаа ч дотоодын хэрэглээ сул хэвээр байгаа нь эдийн засгийн сэргэлтийг жигд бус болгож байна. Иймээс ойрын саруудад Бээжин хэрэглээ, хөрөнгө оруулалтыг дэмжих бодлогоо эрчимжүүлэх төлөвтэй байгаа бөгөөд VII сарын Улс төрийн товчооны хурлаас гарах шийдвэрүүд зах зээлийн анхаарлын төвд байх болно.