ГОЛ ӨНЦӨГ

• Худалдааны хэлэлцээрийн цонх хаагдаж, хэлэлцээр хийж чадаагүй улсууд дээр АНУ өндөр тариф тогтоолоо.
• БНХАУ & АНУ хоорондын худалдааны хэлэлцээр тодорхойгүй байна.
• БНХАУ –н экспорт, импортын өсөлт хүлээлтийг эвдэж, “HSI” индекс өсөлттэй.

Пүрэв гарагийн 15:10 цагт Хонг Конгын хөрөнгийн биржийн “Hang Seng” индексийн фьючерс ханш 0.90% өсөж 25,050 нэгжид хүрэв, “Hang Seng Tech” индекс 0.22% өсөв, “CSI 300” индекс 0.02% өсөв. Азийн бусад захын хувьд Японы “Nikkei 225” индекс 0.65%  өсөв, Австралийн “S&P/ASX 200” индекс 0.14% унав, БНСУ -н “KOSPI” индекс 0.92% өсөв.

Эх сурвалж: Таван Богд Капитал ҮЦК

ХОНГ КОНГЫН ХӨРӨНГИЙН ЗАХ ЗЭЭЛ

Онцлох хөдөлгөөн: INNOSCIENCE /2577.HK/ 5.2% өсөж 67.45 HKD, LAOPU GOLD /6181.HK/ 3.2% өсөж 793.0 HKD, INNOVENT BIO /1801.HK/ 6.4% унаж 91.70 HKD хүрсэн.

Хонг Конгын хөрөнгийн бирж “HSI” индекс 0.90% -н өсөлттэй.

АНУ & ТАРИФ

Өнгөрсөн 4 –р сарын эхээр Donald Trump –с танилцуулсан “reciprocal” тарифын бодлого өнөөдрөөс эхлэн хэлэлцээр хийж чадаагүй орнууд анхны хэлбэрээрээ шууд хэрэгжиж эхэлнэ. Хамгийн өндөр тариф тогтоолгосон орнуудыг дурдвал Сири улсад 41% -н тариф, Лаос болон Мьянмар улсуудад 40% -н тариф, Швейцар улс дээр 39% -н тарифыг АНУ тогтоожээ.

Түүнчлэн Бразил болон Энэтхэг улсууд дээр 50% -н тарифыг АНУ –с тогтоожээ. Бразилын хувьд тариф шууд үйлчилж эхэлж байгаа бол Энэтхэг улсын хувьд одоогоор 25% -н түвшинд байна. Ирээдүйд 50% болж өсөх ажээ. Үүний шалтгааныг Donald Trump –н зүгээс Энэтхэг & ОХУ хоорондын газрын тосны наймаатай холбоотой гэв. Энэтхэг улсын худалдан авалт нь ОХУ – Украйны дайныг шууд бусаар санхүүжүүлж байна хэмээн тэрээр үзэл бодлоо илэрхийлжээ.

Нөгөө талаас БНХАУ & АНУ хоорондын 3 дахь худалдааны уулзалт 2025/07/28 –нд болсон хэдий ч дорвитой үр дүн гараагүй. Уг хоёр улсын худалдааны түр хэлэлцээр энэ сарын 14 –нд дуусгавар болноо.

ӨНӨӨДРИЙН СТАТИСТИК

Balance of Trade гэдэг нь тухайн сард хийсэн экспорт, импортын дүнгийн зөрөө юм. Экспортын бараа бүтээгдэхүүнийг тухайн улсын үндэсний валютаар худалдаж авдаг тул экспортын эрэлт болон валютын эрэлт шууд холбоотой.

Өнгөрсөн Лхагва гарагт “PMI” индекс хүлээлтээс муу гарч зах зээл унасан. Эсэргээрээ өнөөдөр гадаад худалдааны статистик хүлээлтээс сайн гарч зах зээл өслөө.  7 –р сард БНХАУ –н экспорт YoY +7.2% өссөн нь хүлээлт 5.4% болон өмнөх сарын өсөлт 5.8% -с өндөр дүн болов. Импортын өсөлт сүүлийн 12 сарын дээд түвшинд хүрсэн буюу өнгөрсөн сарын өсөлт болон “Reuters” –с эмхэтгэсэн шинжээчдийн дундаж хүлээлтийг эвдэж YoY +4.1% өсөв. Үр дүнд гадаад худалдааны ашиг $98.24 тэрбум ам.доллар гарчээ.

2025 оны эхний 7 сарын байдлаар тооцвол экспортын хэмжээ 6.1% өссөн бол импортын хэмжээ 2.7% буурсан дүр зурагтай байна.

УРЬДЧИЛСАН СТАТИСТИК

CPI буюу Inflation Rate гэдэг нь хэрэглээний сагсанд орсон бараа, үйлчилгээний үнийн индексийг өмнөх сар болон жилтэй харьцуулан хэдэн хувиар өсөж буурсныг харуулдаг үзүүлэлт юм.

PPI гэдэг нь үйлдвэрлэгчдийн худалдан авсан болон зарсан бүтээгдэхүүн, үйлчилгээний үнийн өөрчлөлт юм.  Үйлдвэрлэгчдийн худалдан авалтын зардал өсөх, өөрсдийн бараа бүтээгдэхүүний үнийг өсгөх зэрэг нь ихэвчлэн хэрэглээний сагсны бараа бүтээгдэхүүний үнийг өсгөж инфляцыг өдөөх нөлөө үзүүлдэг.

Бямба гарагт дараагийн өндөр ач холбогдол бүхий статистик болох инфляц зарлагдана. БНХАУ –н хувьд 2025 оны бүтэн жилийн инфляцын зорилтыг 2% орчимд тавьсан. Бодит байдал дээр инфляцын түвшин хасах утга руу орчихсон байна.

Азийн биржийн арилжаанд оролцох

ЭХ СУРВАЛЖ: 

http://www.aastocks.com/en/

https://www.scmp.com/

https://www.cnbc.com/

https://www.bloomberg.com/