ГОЛ ӨНЦӨГ

• “Nio” –с 2025/03/27 –ны өдрийн хаалтын ханшнаас 9.49% -р бага үнээр шинэ хувьцаа гаргана гэв.
• “Morgan Stanley” –с “MSCI China” болон “Hang Seng Index” –н жилийн эцсийн зорилтот түвшингөө 7% гаруй өсгөлөө.
• Ням гарагт “PMI” индекс зарлагдана.
• Хонг Конгын хөрөнгийн биржийн “HSI” индекс 0.9% -н уналттай.

Баасан гарагийн 11:47 цагт Хонг Конгын хөрөнгийн биржийн “Hang Seng” индексийн фьючерс 0.9% унаж 23,420 нэгжид хүрэв, “Hang Seng Tech” индекс 1.85% -р унав, “CSI 300” индекс 0.55% унав. Азийн бусад захын хувьд Японы “Nikkei 225” индекс 2.12% -р унав, Австралийн “S&P/ASX 200” индекс 0.09% -р өсөв, БНСУ -н “KOSPI” индекс 2.0% -р унав, Тайваны “TAIEX” индекс 1.40% -р унав.

Эх сурвалж: Таван Богд Капитал ҮЦК

ХОНГ КОНГЫН ХӨРӨНГИЙН ЗАХ ЗЭЭЛ

Онцлох хөдөлгөөн: AKESO /9926.HK/ 4.1% өсөж 73.9 HKD, INNOVENT BIO /1801.HK/ 1.5% өсөж 46.5 HKD, SMIC /0981.HK/ 3.4% унаж 48.6 HKD хүрсэн.

Хонг Конгын хөрөнгийн биржийн “Hang Seng” индекс өнөөдөр 0.9% -н уналттай байна. 

“NIO”

“Nio” –н зүгээс шинэ хувьцаа гаргаж EV технологи, шинэ бүтээгдэхүүний судалгаа, хөгжүүлэлтэд ашиглах мөн компанийн санхүүгийн балансыг сайжруулах зорилготой ажээ. Тодруулбал 136,800,000 ширхэг энгийн хувьцааг HKD 29.46 –р гаргаж HKD 4.03 тэрбумыг /$518 сая ам.доллар/ босгох ажээ. Шинээр хувьцаа гаргах процесс 2025/04/07 –нд дуусах хүлээлттэй байна.

Шинээр гаргаж буй хувьцааны ханш нь өчигдрийн буюу 2025/03/27 –ны өдрийн хаалтын ханш болох HKD 32.55 –с 9.49% -р хямдхан байна. Энэ нь нэг талаас компанийн зүгээс өндөр ханшаар хувьцаа гаргавал хөрөнгө оруулагчид сонирхохгүй гэж үзсэнийг харуулж байна. Энэ нь хувьцааны ханшид цаашид сөргөөр нөлөөлөх боломжтой.

“Nio” –н хувьд саяхан 2024 оны IV улирлын тайлангаа танилцуулсан. Өмнөх улиралд борлуулалтын орлого RMB 19.7 тэрбум гарсан нь YoY +15.2% өссөн, QoQ +5.5% өссөн үзүүлэлт болсон. Харин цэвэр алдагдал RMB 6.6 тэрбум гарсан нь YoY +37.9% өссөн, QoQ +50.1% өссөн маш муу үзүүлэлт болсон билээ. Түүнчлэн богино хугацаат өр төлбөр нь эргэлтийн хөрөнгөөсөө давсан нь бас нэгэн муу үзүүлэлт байсан. Гэхдээ “Nio” –н хувьд дараагийн 12 сард үйл ажиллагаагаа хэвийн явуулах хангалттай хэмжээний санхүүгийн нөөцтэй хэмээн тайлангийн үеэр хэлсэн байна.

ХӨРӨНГИЙН ЗАХ ЗЭЭЛ

Мягмар гарагт  “Morgan Stanley” –н зүгээс “MSCI China” индексийн зорилтот түвшинг 77 –с 88 болгон өсгөсөн, “HSI” индексийн зорилтот түвшинг 24,000 – 25,800 болгон өсгөсөн байна. Тэгэхээр дээрх 2 индекс нь яг одоогийн түвшнөөс 9% гаруй өсөх боломж байна гэсэн үг юм. Зорилтот түвшинг өсгөсөн шалтгааныг “Morgan Stanley” –н Laura Wang болон Jonathan Garner нарын зүгээс “компаниудын ирээдүйн орлого болон үнэлгээний үзүүлэлтүүд бага зэрэг /moderately/ сайжирсан” хэмээн тайлбарлав.

Түүнчлэн “Goldman Sachs” –н зүгээс БНХАУ –н хөрөнгийн зах зээлийн идэвхжил болон хөрөнгө оруулагчдын сонирхол ихсэж, 2021 оны бух-зах зээлийн түвшинд дөхөж очлоо гэв. Тодруулбал “Goldman Sachs” –н стратегич Kinger Lau, Timothy Moe нарын Лхагва гарагт гаргасан “Дэлхийн хөрөнгийн зах зээл: Хятад эргэн эрэлт хийлээ” гэсэн нийтлэлдээ “Хөрвөх чадвар, үнэлгээ, төрөлжүүлэх талаараа БНХАУ –н хөрөнгийн зах зээл нь боломжит хөрөнгө оруулалтын талбар болоод байна” гэжээ. “Goldman Sachs” –н зүгээс БНХАУ –н хөрөнгийн зах зээлийн зорилтоо өнгөрсөн 2 –р сарын дундуур өсгөж, хиймэл оюун ухааны хөгжил дараагийн 10 жилд Хятадын компаниудын орлогыг нэмэгдүүлнэ хэмээн тодотгов.

УРЬДЧИЛСАН СТАТИСТИК

NBS PMI – Purchasing Managers Index гэдэг нь аж ахуй нэгж байгууллагуудын менежерүүдийн худалдан авалтын индекс юм. Энэхүү үзүүлэлт нь эдийн засгийн үйл ажиллагааны нөхцөл байдлыг тоон үзүүлэлтээр илэрхийлэн сар бүр хэмждэгээрээ онцлогтой. Уг индекс 50 –с доош бол уналт, 50 –с дээш бол эдийн засгийн тэлэлтийг илэрхийлдэг. Тухайн үзүүлэлтийг БНХАУ –н Үндэсний Статистикийн хорооноос 700 гаруй байгууллагуудаас асуулга авч, тухайн сарын эцсээр тооцож зарладаг.

Харин Ням гарагт 3 –р сартай холбогдсон хамгийн эхний бөгөөд чухал статистикуудын нэг “PMI” индекс зарлагдана.

“Таван Богд Капитал ҮЦК” ХХК нь харилцагчдадаа олон улсын хөрөнгийн зах зээлд шууд хөрөнгө оруулах боломжийг нээж байна. Та дараах холбоосоор бүртгүүлнэ үү: https://tavanbogdcapital.com/FeaturedItem/757033

ЭХ СУРВАЛЖ: 

http://www.aastocks.com/en/

https://www.scmp.com/

https://www.cnbc.com/

https://www.bloomberg.com/