ГОЛ ӨНЦӨГ:

• Эрдэнэ Ресурс Девелопмент Корпорэйшн 2024 онд 19.57 тэрбум төгрөгийн алдагдалтай ажилласан
• Баян хөндийн төслийн нийт хөрөнгийн хэмжээ 2 дахин өсөж 512.5 тэрбум төгрөгт хүрсэн байна
• Хувьцааны ханш он гарснаас хойш 17% өссөн байна
• Баян хөндий алтны төслийн бүтээн байгуулалт 66%-ийн гүйцэтгэлтэй үргэлжилж байна

📊 2024 оны санхүүгийн голлох үзүүлэлтүүд

Санхүүгийн үзүүлэлтүүдийг канад доллараас хөрвүүлж тооцоолсон болно.(1 CAD = 2,400 төгрөг)

   Эрдэнэ Ресурс  Девелопмент Корпорэйшн 2024 онд олборлолтын үйл ажиллагаа хараахан эхлээгүй байгаа тул орлого олоогүй байна. Үүний сацуу үйл ажиллагааны зардлууд өссөнөөр компанийн цэвэр үр дүн хасах гарлаа. 2024 оны санхүүгийн жилийн эцэст цэвэр алдагдал нь 19.57 тэрбум төгрөгт хүрсэн нь өмнөх 2023 онд гаргасан 1.23 тэрбум төгрөгийн цэвэр ашигтай харьцуулахад эрс муудсан үзүүлэлт юм. Энэхүү өөрчлөлтийн гол шалтгаан нь зардлууд нэмэгдсэн болон 2023 онд нэг удаагийн олз байсантай холбоотой.

   Гол зардлын ангиллуудаас авч үзвэл хайгуул, үнэлгээний зардал 2024 онд 4.40 тэрбум төгрөг болж, өмнөх оноос даруй 118% нэмэгдсэн байна Энэ нь Баян Хөндий төслийн талбайд хийгдсэн өрөмдлөг, геологийн судалгааны ажлууд болон стратегийн түншлэлийн гэрээ байгуулагдсанаар зарим зардлыг компани өөрөө шууд санхүүжүүлэх болсон зэргээс шалтгаалжээ.

   Мөн ерөнхий ба удирдлагын зардал өмнөх оноос 60% өсөж 7.45 тэрбум төгрөгөөс 11.96 тэрбум төгрөгт хүрсэн бөгөөд үүнд төслийн санхүүжилтийн эх үүсвэртэй холбоотойгоор өмнө нь капиталжуулж байсан нь нөлөөлжээ.

   Түүнчлэн, стратегийн түншлэлийн хүрээнд хамтарсан компани болох Эрдэнэ Монгол ХХК-д оруулсан хөрөнгө оруулалтын алдагдал 7.70 тэрбум төгрөгт хүрчээ. Өмнөх 2023 онд стратегийн гэрээ байгуулах үед гарсан 15.52 тэрбум төгрөгийн олзоос 80% бага буюу 2.99 тэрбум төгрөгийн олзыг ММС-тай түншлэлийн гэрээний үр дүнд олсон байна.

   Компани 2024 онд үйл ажиллагааны бэлэн мөнгөний урсгалаараа 7.83 тэрбум төгрөгийн цэвэр зарлагатай ажилласан бөгөөд энэ алдагдлыг санхүүжүүлэхийн тулд санхүүгийн үйл ажиллагаагаар дамжуулан нийт 15.28 тэрбум төгрөгийн хөрөнгө босгосон байна. Тодруулбал, хувьцааны опцион, варрантыг хэрэгжүүлснээр 1.94 тэрбум болон 13.34 тэрбум төгрөгийг тус тус хөрөнгө татан төвлөрүүлжээ.

   Үүний дүнд 2024 оны жилийн эцэст компанийн бэлэн мөнгө болон түүнтэй адилтгах хөрөнгийн үлдэгдэл 17.32 тэрбум төгрөг болж, нэг жилийн өмнөх 10.32 тэрбум төгрөг байснаас 67% нэмэгдсэн үзүүлэлттэй байна.

📝Хөрөнгө ба өр төлбөрийн бүтэц

   Хөрөнгө ба өр төлбөрийн хувьд, Эрдэнэ Ресурс компанийн хувийн балансаар харьцангуй бага хэмжээний, ихэвчлэн богино хугацаат өр төлбөртэй бөгөөд нийт өөрийн хөрөнгө 139.01 тэрбум төгрөгийн хэмжээнд байгааг тайланд харуулжээ. Компани 2024 онд гол төслийнхөө санхүүжилтийг охин компаниараа дамжуулан шийдсэн тул толгой компанийн баланст их хэмжээний өр төлбөр нэмэгдээгүй байна.

⛰Баян Хөндий төслийн хөрөнгө оруулалт ба өөрчлөлт

   Эрдэнэ Монгол ХХК-ийн төсөл болох Баян Хөндийн хувьд нийт хөрөнгийн хэмжээ 2023 оны эцэст 253.91 тэрбум төгрөг байсан бол 2024 оны эцэст 2 дахин өсөж 512.57 тэрбум төгрөгт хүрсэн нь ММС-ээс хийсэн хөрөнгө оруулалт болон төслийн зээлийн хөрөнгө орж ирсэнтэй холбоотой. Үүнээс төсөл хэрэгжүүлэгч компанийн өөрийн хөрөнгө 251.29 тэрбум төгрөг болсон бөгөөд үүний 50% буюу 126.02 тэрбум төгрөг нь Эрдэнэ Ресурсийн эзэмшилд ногдох хөрөнгө оруулалтын бүртгэлийн үнэ цэнэ болж байна.

   Хөрөнгө оруулалтын талаас, 2024 онд стратегийн түншлэлийн дүнд Эрдэнэ Ресурс нь Баян Хөндий төслийн 50%-ийг ММС-д шилжүүлж, оронд нь дээрх 40 сая ам.долларын санхүүжилттэй тэнцэх хөрөнгө оруулалт болон ирээдүйн рояалтигийн эрхийг өөртөө авч үлдсэн нь компанийн баланс дахь хамгийн том хөрөнгө оруулалт болоод байна. Мөн компанийн 100%-ийн эзэмшилд үлдсэн хайгуулын тусгай зөвшөөрөлд байх Алтан нар орд нь хайгуул ба үнэлгээний хөрөнгө гэсэн ангилалд 99.97 тэрбум төгрөөр бүртгэгдсэн байна. 

   Эцэст нь 2024 онд санхүүгийн үзүүлэлт төлөвлөгөөний дагуу алдагдалтай гарсан боловч компанийн хөрөнгө оруулалтын үйл ажиллагаа амжилттай үргэлжилж байна. Удирдлага мөнгөн урсгалын богино хугацааны хэрэгцээгээ амжилттай шийдвэрлэж чадсан тул 2025 оноос олборлолт эхэлснээр орлого бий болж, санхүүгийн байдал сайжрах хүлээлттэй байна. 

🏗️ Баян Хөндий төслийн явц
   Уурхайн барилгын ажил оны эцэст 66%-ийн гүйцэтгэлтэй байгаа бөгөөд хүдэр боловсруулах үйлдвэр 67%, бусад дэд бүтцийн байгууламжууд 60-80%-тай байна. 2025 оны 5-р сараас ажиллуулж эхлэн, III улиралд албан ёсоор алт олборлолтыг эхлүүлэх төлөвлөгөөтэй. Төслийн зардал анх төсөвлөснөөс 15%-иар нэмэгдсэн ч нэмэлт санхүүжилт шаардахгүйгээр шийдвэрлэгдсэн. Үүний зэрэгцээ хайгуулын ажлаар алтны өндөр агуулгатай шинэ бүсүүдийг илрүүлсэн нь нөөцийг цаашид нэмэгдүүлэх боломжтойг харуулж байна. 

🎯 Удирдлагын стратеги ба эрсдэлийн бууралт
   Эрдэнэ Ресурсийн удирдлага ММС-тай байгуулсан стратегийн түншлэл болон Худалдаа Хөгжлийн Банкны нэмэлт зээлээр санхүүжилтийн асуудлаа шийдвэрлэсэн нь компанийн сайн мэдээ болсон. Ирээдүйд алтны нөөцөө нэмэгдүүлэх зорилгоор хайгуулыг эрчимжүүлж, орон нутгийн иргэдтэй хамтын ажиллагаагаа өргөжүүлж, ажлын байрыг нэмэгдүүлэхэд анхаарч байна.

📈 Хувьцааны ханшийн хөдөлгөөн ба зах зээлийн хүлээлт

   Эрдэнэ Ресурс  Девелопмент Корпорэйшнийн хувьцааны ханш 2024 онд хэлбэлзэлтэй байсан ч тогтвортой өсөлттэй жил байлаа. Оны эхэнд компанийн санхүүжилтийн гэрээний тодорхой бус байдлаас үүдэн болгоомжилж, нэгж хувьцааны ханш 800 төгрөг хүртэл буурсан боловч оны III улирлаас төслийн санхүүжилтийн нөхцөлүүд тодорхой болж, эерэг мэдээ мэдээллүүд дараалан гарснаар хувьцааны ханш эргэн өссөн юм.
   Онцлох үйл явдлууд дунд Худалдаа хөгжлийн банктай байгуулсан 50 сая ам.долларын зээлийн гэрээ, Баян Хөндий төслийн санхүүжилт амжилттай шийдэгдсэн, мөн 2024 оны 3-р улиралд зарласан алтны өндөр агуулагатай хайгуулын үр дүн зэрэг нь зах зээлийн эерэг хүлээлтийг бий болгосон. Үүнээс гадна дэлхийн зах зээл дэх алтны үнийн өсөлт ч хөрөнгө оруулагчдын итгэлийг нэмэгдүүлсэн байна.
   Ингэснээр ERDN-ийн хувьцааны ханш 2024 оны хамгийн доод үзүүлэлтээс гэхэд 2.5 дахин өсөж, 1,945 төгрөгийн түвшинд хаагдаж байсан түүхтэй. 2025 оны эхэн үеийн байдлаар ч өсөлт тогтвортой үргэлжилж өнөөдрийг хүртэл ERDN-ийн хувьцаа оны эхнээс 17% өссөн үзүүлэлттэй байна.

⚖️ Хөрөнгө оруулалтын эрсдэл ба өгөөж
   Эрдэнэ Ресурс  Девелопмент Корпорэйшн нь өндөр өгөөжтэй ч эрсдэл өндөртэй хөрөнгө оруулалтын тоонд орж байгаа. 2025 онд алт олборлолт эхэлснээр тогтвортой орлого бүрдэж, компанийн үнэлгээ нэмэгдэх магадлалтай ч, санхүүгийн зардал болон үйлдвэрлэлийн явцад саатал гарах эрсдэлийг анхаарах хэрэгтэй. Энэ хөрөнгө оруулалт нь эрсдэл даах чадвартай, урт хугацааны хөрөнгө оруулагчдад илүү тохиромжтой юм.