ГОЛ ӨНЦӨГ

• МХБ “Хөрөнгөөр баталгаажсан үнэт цаасны бүртгэлийн журам”-д нэмэлт өөрчлөлтүүдийг оруулсан
• “Таван Толгой ХК”-ийн хувьцаа хоёр удаагийн багцын арилжаагаар 2.8 тэрбум төгрөгөөр арилжаалагдсан

ХБҮЦ-ИЙН БҮРТГЭЛИЙН ЖУРАМД НЭМЭЛТ ӨӨРЧЛӨЛТ ОРЛОО

   "Монголын Хөрөнгийн Бирж" ТӨХК-ийн Төлөөлөн Удирдах Зөвлөлийн 2022 оны 10 дугаар сарын 28-ны өдрийн 24 тоот тогтоолоор батлагдсан "Хөрөнгөөр баталгаажсан үнэт цаасны бүртгэлийн журам"-ын нэмэлт өөрчлөлтийг Санхүүгийн Зохицуулах Хорооны даргын 2022 оны 12 дугаар сарын 01-ний өдрийн 508 тоот тушаалаар батламжилсан байна. СЗХ-ны “Хөрөнгөөр баталгаажсан үнэт цаас гаргах, бүртгэх, тусгай зөвшөөрөл олгох журам” нь 2022 оны 06 дугаар сарын 22-ны өдөр батлагдсан бөгөөд энэхүү журамтай нийцүүлэн МХБ-ийн "Хөрөнгөөр баталгаажсан үнэт цаасны бүртгэлийн журам"-д холбогдох нэмэлт, өөрчлөлтүүдийг оруулсан байна.

ТАВАН ТОЛГОЙ ХК-ИЙН БАГЦ ХУВЬЦАА 2.8 ТЭРБУМ ТӨГРӨГӨӨР АРИЛЖААЛАГДСАН

   2022 оны 10-р сард Төрийн Банк ХК-ийн IPO-ийн нөлөөллөөр МХБ-ийн нийт арилжааны дүн өсөлттэй байсан бол 11-р сард  Монголын Хөрөнгийн биржид 13.2 тэрбум төгрөгийн арилжаа хийсэн нь өмнөх сараас 5.1 дахин бага үзүүлэлт боллоо. Голомт Банкны IPO-ийн арилжааны дүнг 12-р сарын арилжааны дүнгийн тооцоололд  тусгаж байгаа тухай МХБ мэдээллээ. 11 дүгээр сард нэг удаагийн багцын арилжаагаар “Монгол шуудан” ХК-ийн 3.2 сая ширхэг хувьцаа 2.4 орчим тэрбум төгрөгөөр, хоёр удаагийн багцын арилжаагаар “Тавантолгой” ХК-ийн 349.7 мянган ширхэг хувьцаа 2.8 орчим тэрбум төгрөгөөр эргэлтэд орсон нийт арилжааны 50 орчим хувийг эзлэж байна.

    Таван Богд Капитал ҮЦК ХХК-ийн зүгээс цаг тухай бүр онцлох хувьцаат компаниудын талаар мэдээлэл хүргэдэг ба та эдгээр хувьцаануудын талаар нэмэлт мэдээлэл авах, хөрөнгө оруулах бол доорх утсаар холбогдоно уу.