ГОЛ ӨНЦӨГ: 

• "ХААН Банк” ХК-ийн 2024 оны хагас жилийн цэвэр ашиг 290 тэрбум төгрөг хүрч, өмнөх оны мөн үеэс 6.8%-аар өслөө.
• Харин ашигт ажиллагааны нөлөөгөөр өөрийн хөрөнгийн өгөөж  29.5%-д хүрээд байна.
• Үнэ ашгийн харьцаа P/E=3.5x, үнэ дансны үнийн харьцаа P/B=0.94x буюу зах зээл дээр бодит үнэ цэнээс хямд үнэлэгдсэн байна.

ХААН банкны өөрийн хөрөнгийн өгөөж  29.5%-тай байна. 

   ХААН банкны хувьд 2024 оны хагас жилийн цэвэр ашиг нь  290 тэрбум төгрөгт хүрч, өмнөх оны мөн үетэй харьцуулахад 6.8%-ийн өсөлт үзүүлсэн юм.  Ашигт ажиллагааны өсөлтийн нөлөөллөөр өөрийн хөрөнгийн өгөөж  29.5% хүрсэн ба сүүлийн хоёр жилийн өгөөжийн түвшинтэй харьцуулахад тогтвортой байна. Энгийнээр хэлбэл өөрийн хөрөнгийн 1 төгрөг бүрээс 0.30 төгрөгийн өгөөж хүртэж буйг илэрхийлэх юм. Уг өсөлтөд зээлийн хүүгийн орлого болон үнэт цаасны орлогын өсөлт өндөр нөлөө үзүүлжээ. 

  Харин нийт цэвэр зээлийн багц өмнөх оны мөн үеэс 22% өсөлт үзүүлсэн ба 10.6 их наяд төгрөгийн зээлийн багцтай байна. Нийт багцад эзлэх чанаргүй зээл 4.5% байгаа нь  өмнөх оны мөн үеэс 0.7 нэгж хувиар буурсан үзүүлэлттэй байгаа юм. Чанаргүй зээлийн хэмжээ буурах тусам тухайн зээл эргэн төлөгдөхгүй байх эрсдэл буурдаг тул энэ үзүүлэлт бага байх нь банкнуудын хувьд  таатай үзүүлэлт юм.

Нийт хөрөнгө өмнөх оны мөн үеэс 26%-аар өсжээ. 

  2024 оны  хагас жилийн байдлаар нийт хөрөнгө нь 20.1 их наяд төгрөгт хүрч, өмнө оны мөн үеэс 26%-ийн өсөлт үзүүлжээ. Харин хүүгийн орлого 1.2 их наяд төгрөгт хүрч  28%-ийн  өсөлт үзүүлсэн ч хүүгийн зардал 34%-аар өсөж 622 тэрбум төгрөг хүрсэн байна. Монгол банкнаас бодлогын хүүг 1%-аар 2024 оны 5 сарын 13-ны өдөр бууруулж 11%-т хүргэсэн нь цаашид нийт арилжааны банкнуудын хүүгийн зардлын өсөлт буурахад нөлөө үзүүлж байна. 

Өөрийн хөрөнгийн хүрэлцээний харьцаа 15.7%-тай гарлаа. 

Арилжааны банк нь Монголбанкнаас тогтоосон зохистой харьцааны шалгуур үзүүлэлтүүдийг хангаж ажиллах ёстой байдаг бөгөөд эдгээр үзүүлэлтүүдээс өөрийн хөрөнгийн хүрэлцээ болон хөрвөх чадварын үзүүлэлтүүдийг графикт харуулав.  

   Өөрийн хөрөнгийн хүрэлцээ гэдэг нь тухайн банк санхүүгийн болон үйл ажиллагааны эрсдэлээс гарах алдагдлыг хаахад хүрэхүйц өөрийн хөрөнгөтэй эсэхийг тодорхойлдог үнэлгээ бөгөөд Монгол банкнаас уг үзүүлэлтийг 12%-с өндөр байхыг шаарддаг. ХААН Банкны хувьд уг үзүүлэлт 15.7% байгаа нь шаардлага хангаж ажиллаж байгааг илэрхийлж байна. 

   Төлбөр түргэн гүйцэтгэх чадварын харьцаа нь тухайн банк харилцагчийн өмнө хүлээсэн үүргээ цаг хугацаанд нь биелүүлэх чадварыг харуулдаг бөгөөд Монголбанкнаас уг үзүүлэлтийн хамгийн багадаа 25%-с их байхыг шаарддаг. ХААН Банкны хувьд уг үзүүлэлт 45.2% буюу мөн шаардлага хангаж ажиллаж байгааг илэрхийлж байна. 

Ашигт ажиллагаа өсөж байгаа хувьцааны ханш доогуур үнэлэгдэж байна 

 2024.07.19-ны байдлаар компанийн хувьцааны ханш нь IPO хийсэн (959 төгрөг) ханшаас 7.7%-ийн өсөлт үзүүлж 1033 төгрөг орчимд ирсэн байна. IPO хийснээс хойш ханш хамгийн багадаа 1008 төгрөгт хүрсэн байна.

Шинжээчийн дүгнэлт: 

   ХААН банкны хувьд хувьцааны үнэлгээг тодорхойлдог үнэ ашгийн харьцаа P/E=3.5x байгаа ханш хямд байна. Нөгөө талаар үнэ дансны үнийн харьцаа P/B=0.94x байгаа нь үнэлгээ нь зах зээл дээр илүү бодит үнэ цэнээс доогуур үнэлэгдсэн байна. Өөрөөр хэлбэл тухайн компанийн өөрийн хөрөнгийн нэг төгрөг тутам зах зээл дээр 0.94 төгрөгөөр үнэлэгдэж арилжаалагдаж байна гэсэн үг юм.  

   ТАЙЛБАР   

Өөрийн хөрөнгийн өгөөж: Return on Equity буюу RoE үзүүлэлт нь сүүлийн 12 сарын нийт цэвэр ашгийг дундаж өөрийн хөрөнгөд харьцуулж тооцох замаар нэгж эздийн өмчид ногдох ашгийн хувийг илтгэдэг харьцааны үзүүлэлт юм.