ГОЛ ӨНЦӨГ

• Хүүгийн орлого өнгөрсөн оны мөн үетэй харьцуулахад 15.77% аар өсөж, 1 их наяд давлаа
• Тайлант хугацааны цэвэр ашиг 351 тэрбум төгрөг буюу өмнөх оны мөн үеэс 53.29% өслөө
• Өөрийн хөрөнгийн өгөөж 29.3% хүрч, түүхэн хамгийн өндөр түвшинд байна
• Чанаргүй зээлийн хувь 5.4% буюу өмнөх оны мөн үетэй ойролцоо түвшинд байна

БАНКНЫ ТУХАЙ

   ХААН Банк үүсгэн байгуулагдаад 30 гаруй жил болж байгаа бөгөөд орон даяар нийт 547 салбар нэгжтэй, Монгол Улсын нийт айл өрхийн 70 гаруй хувьд буюу 2.7 сая харилцагчид банк санхүүгийн цогц үйлчилгээг хүргэн ажиллаж байна. 

ХҮҮГИЙН ОРЛОГО

   Нийт хүүгийн орлого 1.0 их наяд буюу өнгөрсөн оны мөн үетэй харьцуулахад 15.77%-ийн өсөлттэй, хүүгийн зардал 382.4 төгрөг буюу өнгөрсөн оны мөн үетэй харьцуулахад 10.08% буурсан байна. Хүүгийн зардлын бууралтад харилцах данс хүүгүй болсон болон хадгаламжийн бууралт өндөр нөлөөлсөн байна. Зөвхөн энэ  III улиралд ХААН банкны хадгаламжийн дүн 495 тэрбумаар буурсан бол харилцах 245 тэрбумаар өссөн байна. Улмаар зардал буурч, орлого өссөнөөр цэвэр ашиг 351 тэрбум төгрөг буюу өмнөх оны мөн үеэс 53.29% өслөө. Системийн таван банкнаас өөрийн хөрөнгийн өгөөжөөр Хас Банк  29.5%-аар тэргүүлж байгаа бол ХААН Банк 29.3%-аар буюу бараг тэнцүү дүнгээр удаалж байна. 

   Банкнуудын чанаргүй зээлийн хувь бууралттай байгаа нь Монголбанкнаас чанаргүй зээлийн ангилалд тооцох хоногийг нэмсэн, ипотекийн зээлийн төлөлт хойшилсон зэрэг арга хэмжээнүүдтэй холбоотой байна. "ХААН Банк"-ны хувьд чанаргүй зээлийн хувь 5.4% буюу бусад системийн банкнуудтай харьцуулахад өрсөлдөхүйц сайн үзүүлэлттэй байна.    Арван их наяд төгрөгийн эдийн засгийг дэмжих хөтөлбөрийн хүрээнд 3% хүүтэй зээл олгосон болон 9%-ийн репо санхүүжилт авч ашиглаж байгаа зэрэг хөшүүргийн нөлөөгөөр банкнуудын зээлийн үлдэгдэл 2021 онд 22% өссөн бөгөөд 2022 онд үргэлжлэн өсөлттэй билээ. "ХААН Банк"-ны хувьд цэвэр зээл 7.5 их наяд хүрч өмнөх оны мөн үеэс 19.1%-аар байна. 

   Цар тахалтай холбоотойгоор иргэд, ААН-ийн зээлийн эрэлт нэмэгдсэн бөгөөд нөгөөтэйгөөр эдийн засгийг дэмжих хөтөлбөрийн хүрээнд зээл олголт нэмэгдсэн тул банкнуудын хөрвөх чадвар ерөнхийдөө бүгд буурсан бөгөөд "ХААН Банк"-ны хувьд хөрвөх чадвар 49.1%-аас 38.0% хүртэл буурсан боловч зохистой харьцааны шалгуур түвшин 25%-ийг ханган ажиллаж байна. 

   Харин өөрийн хөрөнгийн хүрэлцээ нь 15.9%-буюу зохистой харьцааны шалгуур түвшин 10%-ийг бүрэн хангаж байна. Өөрийн хөрөнгийн хүрэлцээ нь хөрөнгө ашиглалтыг илэрхийлдэг бөгөөд хэт өндөр байх нь нэг талаас хөрөнгөө ашиглахгүй байгааг, нөгөөтэйгөөр үйл ажиллагаагаа улам тэлэх боломжтой байгааг илэрхийлдэг. 

ШИНЖЭЭЧИЙН ДҮГНЭЛТ

   Харилцах данс хүүгүй болсон болон хадгаламжийн дүн буурсантай холбоотойгоор хүүгийн зардал буурсан байна. Харин хүүгийн орлого өнгөрсөн оны мөн үетэй харьцуулахад 15.77%-аар өсөж нэг их наяд хүрлээ. Улмаар зардал буурч, орлого өссөнөөр цэвэр ашиг 351.8 тэрбум хүрч өнгөрсөн оны мөн үетэй харьцуулахад 53.28%-аар өссөн үзүүлэлттэй байна. Орлого ашиг тогтвортой өсөлттэй, чанаргүй зээлийн хувь бага бөгөөд Монголбанкны зохистой үзүүлэлтүүдийг хангалттай түвшинд хангаж байгаа тул "ХААН Банк" IPO хийснээр эрсдэл багатай, өгөөж өндөртэй хөрөнгө оруулалтын шинэ боломж хөрөнгийн зах зээлд бий болох нь. 

   Таван Богд Капитал ҮЦК ХХК-ийн зүгээс цаг тухай бүр онцлох хувьцаат компаниудын талаар мэдээлэл хүргэдэг ба та эдгээр хувьцаануудын талаар нэмэлт мэдээлэл авах, хөрөнгө оруулах бол доорх утсаар холбогдоно уу.