ГОЛ ӨНЦӨГ

• БНХАУ 2026 оны эхний найман сард 1,000 гаруй тонн алт импортлоход 158.8 тэрбум ам.доллар зарцуулжээ.
• Ардын банк IX сард алтны нөөцөө 21 гаруй тонноор нэмэгдүүлсэн нь сүүлийн гурван жилийн хамгийн өндөр сарын худалдан авалт болов.
• Төв банкны нөөцийн төрөлжилт болон өрхийн аюулгүй хөрөнгөд шилжих хандлага алтны эрэлтийг дэмжиж байна.

БНХАУ-ын төв банк болон дотоодын хөрөнгө оруулагчид алтны худалдан авалтаа эрчимжүүлснээр тус улсын алтны импорт түүхэн дээд түвшинд хүрлээ.

БНХАУ 2026 оны I–VIII сард 1,000 гаруй тонн алт импортлоход 158.8 тэрбум ам.доллар зарцуулсан байна. Энэ нь 2025 оны бүтэн жилийн 886 тонн, 96.5 тэрбум ам.долларын үзүүлэлтийг аль хэдийн давжээ. Импортын үнийн дүн огцом өссөнд худалдан авалтын хэмжээ нэмэгдсэнээс гадна алтны үнэ өмнөх оноос өндөр түвшинд хадгалагдсан нь нөлөөлсөн байна. 

Төв банкны худалдан авалт гурван жилийн дээд түвшинд хүрэв

БНХАУ-ын Ардын банк IX сард алтны нөөцөө 21 гаруй тонноор нэмэгдүүлсэн нь 2023 оны IX сараас хойших хамгийн өндөр сарын өсөлт болов. Ингэснээр төв банк 23 сар дараалан алт худалдан авч, гадаад валютын улсын нөөцөө төрөлжүүлэх бодлогоо үргэлжлүүллээ. 

IX сарын худалдан авалт VII сарын 18 тонн, VIII сарын 18.5–20 тоннын өсөлтөөс давсан байна. Алтны үнэ оны эхний дээд түвшнээс буурсан нь Ардын банканд харьцангуй таатай үнээр нөөцөө нэмэгдүүлэх боломж бүрдүүлжээ.

Энэ нь зөвхөн үнийн бууралтыг ашигласан богино хугацааны худалдан авалт бус, ам.долларын хөрөнгөөс хамаарах хамаарлыг аажмаар бууруулж, геополитик болон санхүүгийн эрсдэлээс нөөцөө хамгаалах урт хугацааны бодлогын нэг хэсэг гэж үзэж байна.

Өрхийн хөрөнгө алт руу шилжиж байна

Алтны эрэлт зөвхөн төв банкаар хязгаарлагдахгүй байна. Үл хөдлөх хөрөнгийн зах зээлийн удаан үргэлжилсэн уналт, хувьцааны зах зээлийн сул гүйцэтгэл болон хадгаламжийн өгөөж буурсан нь БНХАУ-ын өрхүүдийг хөрөнгөө хадгалах өөр хэрэгсэл хайхад хүргэжээ.

Үүний нөлөөгөөр үнэт эдлэлээс илүү гулдмай, зоос болон алтны санхүүгийн бүтээгдэхүүнд чиглэсэн хөрөнгө оруулалтын эрэлт нэмэгдэж байна. БНХАУ-д гулдмай болон зоосны худалдан авалт 2025 онд анх удаа үнэт эдлэлийн хэрэглээнээс давсан нь алт хэрэглээний бүтээгдэхүүнээс хөрөнгө хадгалах хэрэгсэл рүү шилжиж байгааг харууллаа. 

Дэлхийн алтны үнэд дэмжлэг үзүүлнэ

БНХАУ нь дэлхийн алтны томоохон хэрэглэгчдийн нэг тул тус улсын импорт болон төв банкны худалдан авалт нэмэгдэх нь олон улсын зах зээлд тогтвортой эрэлт бий болгож байна.

Ялангуяа төв банкууд алтыг богино хугацааны ашиг олохоос илүү нөөцөө төрөлжүүлэх зорилгоор худалдан авдаг учраас үнийн хэлбэлзэлд жижиг хөрөнгө оруулагчдаас бага мэдрэг байдаг. Иймээс БНХАУ-ын тогтмол худалдан авалт алтны үнэ буурах үед зах зээлийг дэмжих суурь хүчин зүйл болж байна.

ДҮГНЭЛТ

БНХАУ-ын алтны эрэлт нэмэгдэж байгаа нь төв банкны нөөцийн төрөлжилт болон өрхийн хөрөнгө хамгаалах сонирхол зэрэг хоёр үндсэн хүчин зүйлтэй холбоотой. Энэ нь алтны зах зээлийн эрэлт барууны хөрөнгө оруулалтын сангуудын богино хугацааны урсгалаас бага хамаарах нөхцөл бүрдүүлж байна.

Гэхдээ АНУ-ын бодлогын хүү болон Засгийн газрын бондын өгөөж өндөр хэвээр байх нь хүүгийн орлого өгдөггүй алтны ханшид богино хугацаанд дарамт үзүүлж болзошгүй. Мөн ам.долларын эсрэг юань сулрах нь БНХАУ-ын худалдан авагчдын хувьд алтны өртгийг нэмэгдүүлэх эрсдэлтэй.

Цаашид Ардын банкны худалдан авалт, БНХАУ-ын импортын хэмжээ, ам.долларын ханш болон АНУ-ын мөнгөний бодлого алтны үнийн чиглэлийг тодорхойлох гол хүчин зүйл болно.

ЭХ СУРВАЛЖ:

www.cnbc.com
www.investing.com
www.gold.org